रंगखबर, काठमाडौँ: प्रियंका कार्की र दीया मास्केको मुख्य भूमिका रहेको हरर फिल्म ‘मम्मी’को फस्टलुक पोस्टर रिलिज गरिएको छ। निर्माण टिमले फस्टलुक पोस्टर रिलिज गर्दै फिल्मको रिलिज डेटपनि फिक्स गरेको छ। हरर फिल्मलाई निर्माण टिमले माघ २५ गतेबाट रिलिज अर्ने घोषणा गरेको छ। सार्वजनिक पोस्टरमा अभिनेत्री दियालाई डरलाग्दो रुपमा देख्न सकिन्छ। उनको अनुहार भरि रगतै रगत देखन सकिन्छ भने अभिनेत्री प्रियंका कार्कीलाई भने गम्भीर भावमा देख्न सकिन्छ।
एसओ ट्वान्टी फाइभको ब्यानरमा निर्माण भएको फिल्मलाई समर निरौलाले निर्देशन गरेका हुन्। लोकराज जोशी र पूर्णिमा जोशीको लगानीमा निर्माण भएको फिल्ममा सुमन कोइराला कार्यकारी निर्माताको रुपमा छन् भने निर्देशक समरकै लेखन रहेको छ।
फिल्ममा प्रियंका र दीयाको साथमा सुलक्षण भारती, समिप निरौला, घनश्याम जोशी, आयुषी ढकाल, जेभिस श्रेष्ठ, गुराँस ढकाल, रीना ढकाल लगायतका कलाकारहरुको अभिनय छ ।
शरद महत्तोको छायांकन रहेको यो फिल्मलाई काठमाडौंमा काफिया फिल्मस् र मोफसलमा कुवेर फिल्मस्ले वितरण गर्नेछ ।