रंगखबर, काठमाडौँ: फिल्म ‘बिगुल’ बन्ने भएको छ। अभिनेता नरेन खड्कालाई मुख्य भूमिकामा अनुबन्ध गराउँदै निर्माण टिमले फिल्मको घोषणा गरेका हुन्। सामाजिक कथावस्तुमा आधारित रहेर बन्ने फिल्मलाई रमेश कोइरालाले निर्देशन गर्नेछन्।
अन्यायविरुद्धको आवाज उठाउने कथावस्तु बोकेको ‘बिगुल’ मा नरेनबाहेक अन्य कलाकारहरूको छनोट टुंगो लाग्न बाँकी छ । निर्माण टिमले उनको अपोजिटमा अभिनेत्रीको खोजी गरिरहेको छ ।
मौनता श्रेष्ठको लेखन रहने फिल्ममा कल्पना पौडेल प्रस्तुतकर्ताका रूपमा रहनेछिन्। शिव ढकालले छायांकनको जिम्मा लिएको फिल्म एमजीपी ब्यानरमा निर्माण हुनेछ।
फिल्म नयाँ वर्ष २०८२ को बैशाख १ गते विशेष मुहूर्त गरी फ्लोरमा जाने निर्माण टिमको जानकारी रहेको छ।