रंगखबर, काठमाडौं – दयाहाङ राई र सौगात मल्ल स्टारर फिल्म ‘दुई नम्बरी’ सार्वजनिक प्रदर्शनमा आएको छ ।
मित्रता र बन्यजन्तु शिकारीको कथा भन्ने फिल्ममा उपासना सिंह ठकुरी, उगेन छोदेन, बुद्धि तामाङ, पुस्कर गुरुङ, श्रेयष पौडेल, कविता आले, शारदा गिरी, प्रकाश घिमिरे, सुष्मा निरौलालगायतको पनि अभिनय छ ।
यहि फिल्मबाट भुटानी अभिनेत्री उगेन छोदेनले नेपाली रजतपटमा डेब्यु गरेकी छन् ।
कमेडी जनरामा निर्माण भएको यस फिल्ममा दीपेन्द्र लामाको लेखन तथा निर्देशन छ । निर्देशक लामाले यसअघि ‘छ माया छपक्कै’, ‘घामपानी’ र ‘गोपी’जस्ता फिल्म निर्देशन गरेर ख्याति कमाइसकेका छन् ।
सिमित प्रचारप्रसारका बीच रिलिज भएको फिल्मले मल्टिप्लेक्समा राम्रो शोज पाएको छ । दशैंपछिको दर्शक मूडलाई फिल्मले बक्सअफिसमा डोर्याउने अपेक्षा गरिएको छ ।
सुशन प्रजापतिको छायांकन रहेको फिल्ममा जयन जे वाइवा/भुषण खतिवडाको संगीत र निमेष श्रेष्ठको सम्पादन छ ।
किरण नेपाली प्रस्तुतकर्ता रहेको फिल्ममा सरोज नेपालीको कार्यकारी निर्माण, दीपक मनाङ्गे/अमलादेवी राई/जयस श्रेष्ठको लगानी र मिठु तामाङ्नीको सहलगानी छ ।